«Tekst lingvistikası» pániniń úyreniw obekti tekst qubılısı bolıp, ol gápke salıstırǵanda iri kólemli baylanıs quralı, sóylew iskerliginiń ónimi, anıq nızamlılıqlar tiykarında qáliplesken sóylew kórinisleri. Ayırım qánigeler bir ǵana gápte minimal tekst túsinigine teń keliwi múmkin degen pikir bildirgen. N.Turniyazov «tekst bir sóz benen, bir neshe sóz benen, bir neshe gáp penen, bir neshe abzats penen ham bir neshe bap penen bildiriliwi de múmkin» ekenligin aytadı. Sonday-aq, ol «tekst lingvistikası problemaların bir sózli, dizbek yamasa bir jay gáp penen bildirilgen tekstler tiykarında úyreniw maqsetke muwapıq emes. Sebebi, bunday tekstlerge tiykarlanıp, til sisteması elementleriniń sóylewge kóshiriliwine baylanıslı máseleler sıpatlamasın tolıq beriw múmkin emes.