(Polyak xalq ertagi) Bor ekan-u, yo‘q ekan, qaysidir qishloqda bir kambag‘al dehqon bo‘lgan ekan. U nechog‘li jon kuydirib mehnat qilmasin, loaqal oilasining qornini to‘yg‘aza olmas ekan. Shu sabab qo‘shnilari dehqonga «Sho‘rpeshona» deb laqab qo‘yishgan ekan. O‘sha sho‘rpeshonaga otasidan bir parchagina yer meros qolibdi. Yer bo‘lgandayam qanaqasi deng? Chap tomoni botqoqzor, o‘ng tomoni qumloq bo‘lib, unda hatto yulg‘un ham o‘smas ekan. Faqat o‘rtasida bir parchagina yer bo‘lib, u ham boshdan oyoq o‘ydim-chuqur, toshloq ekan. Bunday yerdan hosil undirishga yo‘l bo‘lsin!