Тадқиқотнинг объекти сифатида Ўзбекистон Республикаси Соғлиқни сақлаш вазирлиги Республика клиник офтальмологик касалхонасида даволанган кўрув аъзосининг кимёвий куйиши билан 103 нафар (141 та кўз) беморлар, шунингдек, 36 нафар соғлом шахслар ва тажриба ҳайвонлари (100 та «Вистар» насабли оқ каламушлар) олинган. Тадқиқотнинг предмети бўлиб кўрув аъзосининг кимёвий куйганига 3, 5, 7, 12, 30 кун бўлган беморларга дифференциаллашган даволаш-профилактик тактикани қўллаш, кузатиш натижалари, шунингдек, тажриба хайвонларининг тўқима ва қонини экспериментал-морфологик ўрганиш натижалари ҳисобланади. Тадқиқотнинг усуллари. Тадқиқот вазифаларини амалга оширишда клиник, инструментал, экспериментал, морфологик, иммуногистохимик ва статистик текширув усулларидан фойдаланилди.