Дунё халқлари миллий мусиқа маданиятини ўрганиш, тарғиб қилиш, миллий мусиқа анъаналарини асраб-авайлаш, ижодий ҳамкорликни ривожлантириш, халқаро мусиқа фестивалларини ташкил этиш борасида жиддий ҳаракатлар олиб бормоқда. Бунда ЮНЕСКО халқаро ташкилотининг ўрни каттадир. Бу ташкилот ташаббуси билан нафақат мусиқа маданияти анъаналари, балки унинг тарихи масаласига ҳам жиддий эътибор берилмоқда. Ташкилотнинг “Ипак йўли-мулоқот йўли”, “Мусиқа тинчлик учун”, “ХХ аср мусиқа дурдоналари рўйхати” лойиҳалари доирасида ноёб мусиқа санъат асарлари тарихини ўрганиш, уларни рўйхатга киритиш, илмий-амалий анжуманлар ташкил этиш, мумтоз мусиқа бўйича концертлар уюштириш тадбирлари олиб борилди.