Жаҳон адабиёти тарихида ХХ-ХХI асрлар оралиғи катта ўсиш-ўзгаришлар, янгиликлар ва тараққиёт даври бўлди. Бу вақтда поэтик тафаккур миқёслари янада кенгайиб, оламни бадиий идрок этиш ва тасвирлашнинг реализмдан фарқ қиладиган тамойиллари майдонга келди. Адабий жараёнда сўз санъати янги-янги ғоя, мавзу, услуб, тенденциялар билан бойибгина қолмай, уларнинг тур ва жанрлар қатори ўзаро трансформацияси ва дифференциацияси, синтезлашуви содир бўлди. Биографик роман жанри айнан шу ҳодисанинг ҳосиласи сифатида мазмунан бойиб, янгича кўриниш – шаклга эга бўлди.