Жаҳонда барча давлатлар учун бюджет тизимининг бошқаруви, ривожланиши ва такомиллаштириш муаммолари энг муҳим аҳамиятга эгадир. Маълумки, 2008 йилда бошланган жаҳон молиявий-иқтисодий инқирози давлат бюджетини назорат қилишда, айниқса, давлат қарзини назорат қилиш механизмидаги жиддий камчиликларни очиб берди. Бу, ҳаттоки ривожланган давлатлар учун ҳам энг мураккаб муаммога айланди. Молиявий-иқтисодий инқироз деярли барча ривожланган давлатларни қамраб олган даврда вазият янада чуқурлашди. Зеро иқтисодий инқироз сабаблари орасида давлат маблағларини талон-торож қилиш, меъёрдан зиёд сарфлаш ҳам муҳим ўрин тутди.