"Milliy ǵárezsizlik ideyası» páni dáslep, ideya hám ideologiya tuwralı, olardıń tariyxıy, filosofiyalıq tamırları haqqında tereń bilim beredi. Bul óz gezeginde bul túsiniklerdiń mazmunın, olardıń dóretiwshilik hám wayrangerlik qásiyetleri, insaniyat rawajlanıwı ushın unamlı hám unamsız bolıwı, ǵárezsizlik ideyasınıń dóretiwshilik mánisi, ǵárezsizliktiń eń muqaddes qádriyat ekeni, onı abaylaw, saqlaw,qorǵaw hár birimizdiń wazıypamız ekenligin ańlawǵa járdem beredi. Ideyalar tuwralı bilimlerge insaniyat tarıyxınıń eń qádimgi dáwirlerinen baslap úlken itibar berilgen. Bul atamanıń mazmun, mánisi «ideya» túsinigi arqalı beriledi. Ideya grekshe «idea» sózinen alınǵan bolıp «obraz», «sırtkı kórinis» degen mániske iye. Rawajlanıw barısında bul túsiniktiń mazmunı ózgerip barǵan hám filosofiya tarıyxında hár qıylı mániste isletilgen."