Олий маълумотли топографлар ва геодезистлар тайёрлашда талаблар тобора ортиб бормоқда. Шунга кўра, дастурда кўрсатилган мавзулар бирмунча кенгайтирилди ва уларни мисоллар билан тушунтиришга ҳаракат қилинди. Бундан ташқари, ўқув қўлланмалари талабаларнинг топографияга доир назарий маълумотларни ўрганишдагина эмас, балки лаборатория машғулотларида ҳамда дала практикасида ҳам фойдалана олишлари назарда тутилди. Шу сабабли топография карта устида картометрик ишларни бажариш, топографик асбоблар билан ишлаш, ўлчаш натижаларини ҳисоблаш каби масалалар ҳам баён қилинди.