Daraja:
Oliy o‘quv yurtidan keyingi ta‘lim
Tur:
Avtoreferat
Muallif:
Насиров Абдурахим Абдимуталипович
Nashr etilgan yili:
2016
UDK raqami:
4; 415.61; 48; 494.3
Yaratilgan vaqti:
03.09.2023
Диссертация мавзусининг долзарблиги ва зарурати. Жаҳон тилшунослигида фразеологик бирликларга нисбатан тан олинган ягона ва мукаммал қараш мавжуд эмаслиги ушбу масаланинг доим баҳс-мунозарага сабаб бўлишига ва уларнинг характерли хусусиятларини ўрганишга ундайди.
Ўзбекистоннинг дунѐ ҳамжамиятига интеграциялашуви, фан ва технология ривожи, ѐш авлоднинг кўп маданиятли дунѐда рақобатбардош бўлиши улардан бир неча тилларни мукаммал билишини ҳамда уларни ўзбек тили билан қиѐслаб ўрганишни тақозо этади. «Юксак маънавият - енгилмас куч» номли асарда «...этимологик ва қиѐсий луғатлар нашр этиш, зарур атама ва иборалар, тушунча ва категорияларни ишлаб чиқиш, фарзандларимиз учун чет тиллар, ахборот технологияларини ҳар томонлама пухта эгаллаш борасида қулай имкониятлар яратиш» каби бир-биридан муҳим вазифалар ҳал этилиши лозимлиги уқтирилган.1 Ўзбекистонда тилларни қиѐсий-чоғиштирма тадқиқ этиш юзасидан олиб борилаѐтган муваффақиятли изланишлар билан бир қаторда фразеологизмларни қиѐсий ўрганиш борасида умумий фразеология назариясининг тўлиқ ишлаб чиқилмаганлиги янада жиддий изланишларни тақозо этади.