Шу пайтга қадар никоҳ билан боғлиқ эвфемизмларнинг функционал-стилистик имкониятлари яхлит ҳолда монографик йўналишда тадқиқ этилмаганлиги танланган мавзунинг долзарблигини белгилайди. Ҳолбуки, бу масалани лингвистик нуқтаи назардан тадқиқ қилиш, бир томондан ўзбек тили эвфемизмлари ҳақидаги мавжуд тасаввурларни янада кенгайтирса, иккинчи томондан, никоҳ билан боғлиқ эвфемизмларнинг функционал-стилистик имкониятларини очиб бериш учун хизмат қилади. Эвфемизмларнинг ўзбек тилида ўрганилишига қисқача тўхталиши, уни ўрганишга бағишланган асосий кузатишларга муносабат билдириши, мавзуга алоқадор айрим атамаларнинг изоҳига аниқликлар киритиши, никоҳ билан боғлиқ эвфемизмларнинг ўзаро алмашинуви жараёнида амал қиладиган коммуникатив-нутқий омилларни ёритиши ишнинг қимматини оширган.