Тадқиқотнинг мақсади Cyprinidae оиласи балиқлари гельминтларининг тур таркиби ва гельминтофаунанинг шаклланиш йўлларини аниқлаш ҳамда карп балиқлари гельминтозлари профилактикасининг илмий асосларини ишлаб чиқишдан иборат. Тадқиқотнинг объекти Cyprinidae оиласи балиқлари ва уларда паразитлик қилувчи цестода, трематода, акантоцефа ва нематодалар ҳамда уларнинг личинкалик шакллари ҳисобланади. Тадқиқотнинг предмети Cyprinidae оиласи балиқлари гельминтларининг таксономик таҳлили, экологик-фаунистик тавсифи ҳамда уларнинг шаклланиш йўллари таҳлили; овланадиган балиқлар гельминтозлар профилактикасининг илмий асослари ҳисобланади. Тадқиқотнинг усуллари. Диссертацияда гельминтологик, ихтиопаразитологик, статистик ва қиёсий таҳлил усулларидан фойдаланилган.