Тадқиқот мақсади инулин тутувчи ўсимлик хомашёси экстрактини олиш, қайта ишлаб фруктозали сироп тайёрлаш ва унинг асосида парҳезбоп ширин консервалар таркиби ва олиш технологиясини ишлаб чиқишдан иборат. Тадқиқот объекти топинамбур ўсимлиги туганаги, унинг шарбати, Saccharomyces cerevisiae ачитқиси, Aspergillus oryzae замбуруғи, минерал ва органик кислоталар, табиий нордон мева шарбатлари. Тадқиқот предмети топинамбур туганаги таркибидаги инулинни микроорганизмлар ферментлари, минерал кислоталар ва мева шарбатлари таркибидаги органик кислоталар таъсирида гидролизлаш, жараён натижасида ҳосил бўлган фруктоза миқдорини аниқлаш, олинган фруктозали сиропдан фойдаланиб, ширин консервалар, шарбат ва ичимликлар тайёрлаш. Тадқиқот усуллари. Диссертация ишини бажаришда топинамбур шарбатидаги эриган қуруқ моддалар рефрактометрик, ҳарорат ва муҳит кислоталилиги анъанавий асбоблар ёрдамида, фруктозали сироп таркибидаги фруктоза ва бошқа углеводлар миқдори қоғоз ва микро- ва макроэлементлар ҳамда витаминлар миқдори суюқлик хроматографияси, оқсил миқдори Лоури, умумий қанд миқдори Дьюбуа, фруктоза миқдори Селиванова усуллари ёрдамида аниқланган.