XX - асрнинг бошида модданинг атомлардан ташкил топганлиги ҳақидаги тушунча физиклар ва химиклар учун одат тусига кирди. Маълум бўлдики молекулалар атомлардан ташкил топган, баъзи ҳолларда молекуланинг конфигурацияси (атомларнинг қандай тартибда жойлашгани) ҳам аниқланди. Қаттиқ жисмларнинг кристал панжара тузилишига эга эканлиги топилди ва эркин электронларга эга бўлган металлар билан бундай электронлар бўлмаган диэлектриклар орасидаги асосий фарқ тушунилди.