Тадқиқотнинг мақсади п-нитробензой кислотаси (ПНБК) ва этаноламинлар асосидаги металл ва супрамолекуляр комплексларни синтез қилиш, уларнинг тузилиши ва биологик фаолликларини аниқлашдан иборат. Тадқиқотнинг объекти бўлиб ПНБК, моноэтаноламин (МЭА) ва триэтаноламин (ТЭА), турли металл тузлари ҳамда улар асосида олинган синтез маҳсулотлари хизмат қилади. Тадқиқотнинг предмети этиб олинган моддаларнинг молекуляр ва кристалл структураси ҳамда уларнинг биологик фаоллиги танланган. Тадқиқотнинг усуллари сифатида элементлар таҳлили, масс- ва ИҚ-Фурье-спектрометрия, термогравиметрия ва калориметрия, кукунли ва монокристал рентген структура таҳлили ҳамда олинган моддаларнинг биологик фаоллигини аниқлаш усулларидан фойдаланилган.