Бугунги кун мусиқашунослигида Ўрта аср Шарқ мусулмон оламида юзага келган мақом тизимларининг назарий асослари ва кўп асрлик ижодий-ижрочилик анъаналарини илмий тадқиқ этишга алоҳида эътибор берилмоқда. Чунки бу мумтоз анъаналарда улуғ аждодларнинг салоҳияти билан яралган ҳамда устозлар силсиласи билан узвий давом этиб келаётган ҳаётбахш бадиий қонуниятлар мужассамдир. Бугунги кунда мумтоз мусиқий қадриятларнинг туб асосини белгиловчи бу анъаналар тарихини ўрганиш, уларнинг мақом туркумларини юзага келтиришдаги моҳияти ва мақом услубидаги намуналарни ижод этилишидаги ўрнини аниқлаш масалалари тобора муҳим аҳамият касб этмоқда.