Мамлакатимизда қишлоқ хўжалиги ишлаб чиқариши сувдан фойдаланиш билан бевосита боғлиқ ҳолда фаолият юритади. Республика бўйича экин майдонларини суғориш учун йилига ўртача 55 млрд. м3 сув талаб этилади ва ушбу миқдордаги сув Марказий Осиё давлатларида истеъмол қилинадиган жами сув ресурсларининг деярли ярмига тенг. Айни вақтда республика қишлоқ хўжалигида фойдаланилаётган сувнинг 80 фоизидан ортиғи қўшни давлатлар ҳудудларидан оқиб келиши сув режими барқарорлигини республикамиз ҳудудида ташкил этиш имкониятини чегаралайди. Шу боисдан, қишлоқ хўжалигида сувдан тежаб-тергаб фойдаланишнинг аҳамияти жуда юқори.