Жаҳонда ахборотнинг компьютерли таҳлили, маълумотларни таснифий қайта ишлаш ва тимсолларни таниб олиш усулларини ишлаб чиқишга катта эътибор қаратилмоқда. Ушбу йўналишларда таниб олиш ва тавсифлаш тизимлари, техник ташхислаш, робототехник тизимлар, материалшунослик, технологик жараёнлар, саноат объектларини бошқариш каби техник ва саноат иловаларини ишлаб чиқиш муҳим масалаларидан бири бўлиб қолмоқда. Ҳозирги кунда таниб олиш ва таснифлашнинг детерминлашган, эҳтимолий, мантиқий, тузилмавий каби кўплаб усуллари ишлаб чиқилган. Хорижий мамлакатларда, жумладан АҚШ, Германия, Россия, Хитой, Япония, Жанубий Корея ва бошқа мамлакатларда тимсолларни таниб олиш ва таснифлаш тизимларини назарий ва амалий масалаларини ечишга катта эътибор қаратилмоқда.