2001 йил 11 сентябрь воқеаларидан сўнг Афғонистонда «Толибон» ҳаракатининг ҳокимиятдан четлатилиши билан бир неча йилдан буён давом этаётган афғон муаммоси ҳал бўлиб қолгани йўқ. Ушбу даврда Афғонистонда юзага келган ички сиёсий вазият, афғон жамиятини демократлаштиришнинг муҳим бўғини бўлиши назарда тутилган янги шаклдаги давлатчиликнинг шаклланиш жараёни афғон муаммосининг ижобий ҳал этилишидан манфаатдор бўлган минтақа давлатлари, қолаверса бутун дунё ҳамжамиятида катта қизиқиш уйғотди. Афғон давлати атрофида кейинги бир ярим аср давомида рўй берган воқеалар ва унга халқаро ҳамда минтақавий жараёнларнинг таъсири масаласи долзарб тадқиқот мавзуларидан бўлиб келмоқда.