Ushbu lug‘atda o‘zbek shevalarida qo‘llanib kelgan va hozirda qo‘llanayotgan, xalqimiz turmushi, fikrlash tarzini yorqin ifodalaydigan, uning lisoniy idrokini aks ettiradigan so‘z va iboralar jamlangan va izohlangan; izohlarga badiiy, ilmiy, publitsistik asarlar, xalq og‘zaki ijodi namunalaridan illyustrativ misollar keltirilgan. Kirish maqolasida jamlangan birliklarning zamonaviy lingvistik yondashuvlar asosidagi tadqiqi amalga oshirilgan va shevaga xos birliklar asosida nomlash tamoyillari tahlil qilingan. Kitob filologiya fakultetlari talabalari, tilshunoslik sohalari mutaxassislari, shuningdek, o‘zbek tili targ‘iboti bilan shug‘ullanuvchi jamoat faollari uchun mo‘ljallangan.