Тадқиқот натижаларининг илмий ва амалий аҳамияти. Тадқиқот натижаларининг илмий аҳамияти тери лейшманиозида эрта қўлланган лазерли фотодинамик терапия этиотроп даволаш самарадорлигини ошириши аниқлангани, Гепон иммуномодулятори қўлланилиши ҳисобига лейшманияларга қарши махсус гуморал ва маҳаллий ҳужайравий иммунитетнинг эрта шаклланиши исботлангани, шунингдек, зооноз тери лейшманиозида Гепон препарати ва алоэ экстрактининг маҳаллий қўлланилиши касалликнинг клиник даврлари давомийлигини қисқартириши ҳамда атрофик чандиқланиш даражасини сезиларли камайтириши кўрсатилгани билан изоҳланади. Тадқиқот натижаларининг амалий аҳамияти иммунокомпетент ҳужайралар, жумладан NK-ҳужайралар сонини, шунингдек цитокинлар (IL-4, IL-6 ва ЎНО-α) кўрсаткичларини баҳолаш бўйича амалий тавсиялар ишлаб чиқилганлиги ҳамда бу касалликни ўз вақтида аниқлаш ва даволаш тактикасини такомиллаштириш, беморларнинг тезроқ соғайишини таъминлаш, асоратларнинг олдини олиш ва стационар даволаш харажатларини қисқартириш имконини бериши билан изоҳланади.