Бачадон бўйни патологиясини ташхислаш, даволаш ва олдини олиш учун гинекологлар ва онкогинекологлардан аъзолар анатомияси, физиологияси, морфологиясини чуқур билиш талаб қилинади.Бачадон бўйни патологиялари, Бачадон бўйни саратони ва саратон олди касалликлари кўп учрашига қарамасдан илк этапларда ташхислаш муаммо туғдиради ва гинекологик беморларни ўлимини асосий сабабларидан бири бўлиб ҳисобланади.Бачадон бўйни саратони аёл жинсий аъзоларининг хавфли ўсмалар касалликлари орасида дунёда биринчи ўринда туради. Халқаро Саратон тадқиқотлари агентлиги маълумотларига кўра, 2018 йилда дунё бўйлаб бачадон бўйни саратонининг 570 000 та янги ҳолати ва ушбу касалликдан 311 000 дан ортиқ ўлим ҳолатлари қайд этилган. Аксарият ҳолатлар (81%) ривожланаётган мамлакатларда рўй беради,бачадон бўйни саратони саратон касаллигидан ўлим сабаблари орасида 2-ўринда туради. Ўзбекистон Республикасида аёлларнинг репродуктив тизимининг онкологик касалланиши таркибида бачадон бўйни саратони кўкрак саратонидан кейин иккинчи ўринда туради. Ўзбекистонда барча онкопатологиялар орасида бачадон бўйни саратони бешинчи ўринда туради ва 13% ни ташкил қилади. Ўзбекистон Республикасида хавфли ўсмалардан касалланиш ва ўлим даражаси ҳам бугунги куннинг глобал муаммоларидан бири бўлиб қолмоқда. Ўзбекистон Республикаси Давлат статистика қўмитаси маълумотларига кўра, 2016 йилда бачадон бўйни саратони билан касалланиш 100 000 аҳолига 4,6 ни ташкил этди, бачадон бўйни саратони кўкрак ва ошқозон саратонидан кейин учинчи (4,6/2,5) ўринда туради.