Жамиятда оналар ва болалар тўғрисида ғамхўрлик қилиш ва улар саломатлигини муҳофаза этиш келажак авлод баркамоллигини таъминлашнинг энг асосий ҳал қилувчи омилларидан бири ҳисобланади. Ҳар бир давлатда бу масалага муайян халқ менталитети, иқтисодий ривожланиши ҳамда ижтимоий ҳолатидан келиб чиқиб ёндашилган. Хусусан, совет ҳокимияти йилларида оналик ва болаликни ҳимоя қилиш юзасидан муайян чора-тадбирлар кўрилиб, аёллар ва болалар учун маслаҳатхоналар, сут тарқатиш пунктлари, яслилар очилди ва турли касалхоналар таркибида улар учун бўлимлар фаолияти йўлга қўйилди ҳамда даволаш ўринлари сони кўпайтирилди.