O’zbek adabiyoti tarixi taraqqiyotida Andijon adabiy muhitining ham o’ziga xos salmoqli o’rni bor. Andijon zaminida qadimdan adabiyot, madaniyat, san’at, musiqa kabi sohalarning rivojiga hissa qo’shgan ijodkorlar yetishib chiqqan. Zahiriddin Muhammad Bobur, mavlono Yusuf, mavlono Safoiy, Nodirabegim, Samarbonu, CHo’lpon, Komil Yashin, Habibiy, Hayratiy, Oraziy, Vosit Sa’dulla, Hoshimjon Razzoqov, Ulfat, Saida Zunnunova, Tursunoy Sodiqova, Qamchibek Kenja, Olimjon Xoldor, Minhojiddin Mirzo, Muhammad Yusuf kabi shoir va adabiyotshunoslarning nomlarini xalqimiz bilsa-da, ayrim iste’dodli shoir va adiblarning adabiy merosi ommalashtirilmagani va tadqiq etilmagani sababli, nafaqat xalqimizga, adabiyotshunoslarga ham noma’lum bo’lib kelmoqda. Bu ijodkorlarning asarlari ham adabiy merosimizning bir qismi hisoblanadi.